Karsada sa Tabok gipalapdan

CEBU, Philippines – Sugdan na sa dili madugay ang pagpalapad sa dalan Mabugat sa barangay Tabok sa dakbayan sa Mandaue sa tinguha nga moluag ang dagan sa trapiko sa maong dapit.

Ang maong proyekto, daan nang giplano kaniadto pa ni kanhi Mayor Thadeo Ouano ug ni konsehal Emiliano Rosal sa dakbayan sa Mandaue.

Ang opisyal nga pagbuslot sa yuta agi’g sinyas nga sugdan na sa pagpatuman ang maong proyekto gitambongan ni Mayor Jonas Cortes, bise Mayor Carlo Fortuna ug mga sakop sa konseho uban usab ni kapitan Dario Tariman sa maong barangay..

Si Cortes mibutyag nga dako kaayo og ikatabang sa mga molupyo sa maong lugar ang maong proyekto.

Apan dili lamang sa taga Tabok kundili sa katibuk-ang dakbayan sa Mandaue tungod kay moluag man ang dagan sa mga sakyanan sa highway .

Ang maong proyekto nga gigahinan og P6,100,883.80 sa unang bahin niini, trabahoon sa PLD Construction nga gipanag-iya sa kontraktor nga si Peter Dy kinsa maoy nakadaog sa pagsubasta sa maong proyekto.

Ang ubang bahin kon phase 1 niini, may gitas-on nga 123 metros sa gilapdon usab nga 18 metros lakip sa sidewalk ug kanal niini.

Ang mga panimalay nga naapiktahan sa maong’ “widening’ gipamayran usab sa kagamhanan aron walay makasabod sa maong proyekto.

Magsukad kini sa dalan Jose P. Rizal sa barangay Basak ug molahos ngadto sa barangay Tingob.

Sukad pa sa panahon ni kanhi mayor Ouano ug ni konsehal Rosal kinsa maoy kapitan kaniadto sa barangay Tabok daan na nila kining giplano, apan gumikan sa mga kakulian nga dili kalikayan nalangay ang pagpatuman niini. - Romeo T. Limpangog (BANAT NEWS)