Di mopasiga'g suga silotan

CEBU, Philippines – Mahimo na unyang masilutan kadtong mga balay patigayon sa dakbayan sa Sugbu diha sa Central Business District (CBD) sa siyudad nga dili mopasiga sa ilang mga suga panahon sa kagabhion.

Kini kung maaprubahan ang giduso nga ordinansahon ni Konsehal Rodrigo Abellanosa sa City Council nga alang sa nahisgutang katuyoan.

Gipaabot hinuon nga dunay mosupak sa maong proposal atol sa public hearing nga gitakdang ipahigayon karong hapon diha sa hawanan sa konseho.

Kini subay usab sa nakuha nga feedback sa director sa Colon Revitalization Project nga si George Chiu kinsa usa usab sa giimbitar sa public hearing.

Apan matud ni Abellanosa nga angayang suportahan ang iyang gipalabang nga proposed measure tungod kay kini alang ra usab sa kaayuhan sa dakbayan.

“Ang ato lang gyud diha nga mahayagan ang tanang lugar nga sakop sa CBD ilabi na tong giila nga crime prone areas to deter the commission of crimes,” sumala ni Abellanosa.

Naobserbahan hinuon sa konsehal nga kasagaran karon sa mga balay patigayon sa CBD mopasiga sa ilang mga establisamento matag gabii gawas lang sa pipila nga mamawong kung malawom na ang kagabhion.

“Mas maayo man gyud nang hayag kanunay kay tourism oriented gud ta, mas comfortable man gyud tang musuroy kung hayag ang agianan,” dugang ni Abellanosa.

Ubos sa Zoning Ordinance, ang CBD nagagikan sa V. Rama Avenue lahos ngadto sa dalan Escario padulong sa M.J. Cuenco avenue paingon sa downtown area. - Elly Bolonos (BANAT NEWS)