Pagka-'lone district' sa Lapu' gihangop

CEBU, Philippines – Gikalipay ni Lapulapu City ABC President ug Pajo barangay Kapitan Leo Mercado ang resulta sa senate hearing pag-aprobar sa House Bill 5007 nga maghimo sa Lapulapu nga Lone District.

Matud pa ni Mercado nga dako ang ilang kalipay niini gumikan kay sila sa mga kabarangayan ang makabenepisyo niini.

Gipaabot ni Mercado motaas ang ilang budget sa barangay gumikan sa gahin unya gikan sa Countryside Development Fund kon CDF gikan sa ilang mamahimong Kongresista sa bag-o nilang distrito.

Pinaagi niini ma-pokus ang paggamit niini alang sa mga kalamboan ug proyekto sa dakbayan sa Lapulapu tungod kay sa kasamtangang sitwasyon maghuwat lang ang Lapulapu sa gahin nga ihatag sa ikaunom nga distrito gikan sa gibahin-bahing CDF sa kalungsoran sa maong distrito.

Gipahalipayan usab ni Mercado si 6th District Cong. Nerissa Soon-Ruiz sa paghago ug paglaban sa maong tinguha nga mamahimong "Lone District" ang dakbayan sa Lapulapu.

Kahinumduman nga sa milabay’ng adlaw si Senador Benigno “Noynoy” Aquino III, Chairman sa Senate Committee on Local Government miaprobar sa HB 5007 human si Sec. Mar Roxas , Chairman sa Committee on Laws unang mipadayag sa iyang pag-uyon sa maong balaudnon.

Lakip sa mipabor mao sila si Sen. Francis “Chiz” Escudero, Sen. Ramon “Bong” Revilla Jr. ug Sen. Miguel Zubiri.

Human sa committee level sa Senado ipasaka kini ngadto sa plenaryo ug lain na usab nga paningkamot ang himuon unya nila ni Ruiz, PB Atty. Victor Maambong ug Vice Mayor Mario Amores sa dakbayan sa Lapulapu. Nanghinaut si Mercado nga mahuman na kini sa dili pa matapos ning tuiga. - Bong Soriano (BANAT NEWS)