Pabrika sa plastik gireklamo sa mga residente

CEBU, Philippines – Nagpanon kagahapon sa buntag diha sa city hall ang mga residenteng nagpuyo duol sa usa ka pabrika sa plastik sa sitio Pang-pang, barangay San Isidro, dakbayan sa Talisay aron hangyuon ang dakbayan nga pasirad-an kini gumikan sa kabalaka sa ilang panglawas.

Atol sa gipahigayong sesyon sa konseho kagahapon sa buntag ang mga nahisgutang residente misulod sa session hall aron ireklamo ang ISJ Plastic Center nga giingong naghimo og mga plastic wares. Si Dennis Inocencio uban sa iyang mga silingan sa pakighinabi sa Banat News nagkanayon nga anha lanayon sa maong pabrika ang mga plastic panahon sa gabii.

Ang maong mga residente mipasangil nga tungod sa pagsige nila og singo sa baho sa gipanglanay nga plastic kasagaran kanila ilabi na ang mga bata gipang-ubo, sip-on ug maglisod sa pagginhawa.

Ang mga sakop sa konseho mipasabot ngadto sa maong mga residente nga si Mayor Socrates Fernandez miluwat na og Executive Order (EO) hinungdan nga dili una sila makabuhat og aksiyon niini.

Ang EO Numero 2009-0016 ni Fernandez niadtong Hunyo 1, 2009 nagmando sa temporaryong pagpahunong sa operasyon sa maong pabrika hangtud nga makakompleto sila sa mga rekisitos nga gikinahanglan.

Ang maong EO ang na-serve kagahapon sa buntag ngadto sa nahisgutang factory.

Kahinumduman nga si Konsehal Bernard Odilao kinsa tsirman sa komitiba sa kalikupan mibutyag nga ang maong factory ang walay permit gikan sa barangay ug ang gi-apply niining permit ngadto sa Department of Environment and Natural Resources (DENR) mao ang segregation lang sa mga scrap plastic ug walay melting kon paglanay og mga plastic.

Kahinumduman usab nga ang maong factory ang gihatagan og 15 ka adlaw nga makakompleto sa ilang mga rekisitos apan hangtud karon wala pa makatuman.

Ang nahisgutang lugar nga nahimutangan sa factory usa ka residential area nga gipuy-an sa mokabat 1,000 ka pamilya duol sa maong pabrika.

Ang mga residente nasagmuyo tungod kay niadtong Mayo 18, 2009 giingong gihatagan og temporary permit sa mayor ang maong factory.

Usa sa mga kanhi nagtrabaho sa maong pabrika nga si Sheryl Estoconing, 29, kinsa usa usab sa mga residente mibutyag sa mga tigbalita, human bahiga ang mga plastic tunawon kini diha sa sulod, wala hinuon niya mabutyag kung asa kini dad-on. – BANAT NEWS