Lapulapu 'lone district' na

CEBU, Philippines – Aprobado na sa committee on laws and local government sa senado ang pagkahimong usa ka distrito sa dakbayan sa Lapulapu.

Si Vice Mayor Mario Amores sa dakbayan sa Lapulapu kinsa nakatambong dihang giaprobahan nila ni Senador Mar Roxas ug mga kaubanan sa komitiba kagahapon sa buntag, mipadayag sa iyang kahinangop uban sa pagpasalamat kang Kongresista Nerissa Soon Ruiz sa ikaunom nga distrito sa lalawigan sa Sugbo kinsa maoy nanginahan sa House Bill No. 5007 nga naghimong “lone district” sa dakbayan sa Lapulapu.

Sa sayo pa gipahayag ni Ruiz nga ang pagkahimong usa ka distrito sa Lapulapu dako kaayo og kaayohang idulot ngadto sa mga molupyo niini kay madugangan ang iyang internal revenue allotment sa mahimong countrywide development fund sa usa ka Representante niini ngadto sa Kongreso.

Mahimo na usab nga napulo ug duha ang iyang konsehal ug dili na sila manginlabot sa mga piniliay sa lalawigan busa wala na sila'y botahang gobernador ug mga miyembro sa hunta provincial.

Ingon usab niini ang kahinangop nga gipadayag ni konsehal Efren Herrera sa dakbayan sa Lapulapu kinsa nagkanayon nga dili niya ikaasoy ang mahimong kaayohang matagamtaman sa mga Oponganon niining pagkahimong lone district sa Lapulapu.

Nahinumdom siya sa dihang kongresista pa siya, diin iyang gisang-at nga balaodnon kaniadto sa kongreso nga nagduso sa dakbayan sa Mandaue ngadto sa pagka-lone district.

Matud pa ni Herrera nga gianugonan siya kay kun wala pa masangit ang maong balaudnon didto sa senado hayan nga usa na usab unta ka distrito sa dakbayan sa Mandaue karon.

Matud pa ni Herrera nga kun nahimo pang usa ka distrito ang dakbayan sa Mandaue puwerti untang hayahaya sa mga molupyo niini kay may kaugalingon usab silang representante nga magdala sa ilang tingog ngadto sa ubos balay- balauranan. – BANAT NEWS