Double-session nga klase ipatuman sa DepEd-7

CEBU, Philippines – Dunay tunghaang mopahigayon og double session sa higayon nga mo-grabe gyud ang pagsaka sa gidaghanon sa mga tinun-an sa pampublikong tunghaan dinhi sa rehiyon siyete sa subling pagbukas sa klase kagahapong adlawa.

Kini maoy gipahibawo ni Department of Education Regional director Ricarido Borgonia base sa kamandoan gikan sa DepEd tungod sa kakulangon pa gihapon sa mga lawak saringan.

Hinuon gibana-bana sa direktor nga moabot lang og dos porsiyento ang pagsaka sa gidaghanon sa mga tinun-an sa elementarya ug high school sa pampublikong tunghaan dinhi sa rehiyon siyete karung tuiga.

Dugang usa ka libo usab ka mga magtutudlo sa mga pampublikong tunghaan ang gipakatap aron pagsigurong matubag ang panginahanglanon sa mga pagkuwang sa mga magtutudlo.

Matud ni Borgonia bahin-bahinon ang dugang item sa mga magtutudlo sa tanang tunghaan, wala pa hinuon usab matino sa direktor kung pila gyud ka mga magtutudlo ang kulang.

Samtang gipahibawo usab niya nga mokabat na sa 500 ka mga bag-ong lawak saringan ang nakompleto na sa nagpadayong pagtukod og dugang classrooms alang dinhi sa Central Visayas. - Rey Pasaporte (BANAT NEWS)