CEBU, Philippines – Giawhag sa House committee on Overseas Workers Affairs ang Philippine Overseas Employment Administration (POEA) nga pahamtangan na og silot ang Be Glad Worldwide Placement Agency (BGWPA) nga nagbase sa Cebu.
Kini gumikan sa giingong nakitang iregularidad sa mga dokumento sa mga biktima nga gipalarga sa maong ahensya atol sa gipahigayong congressional hearing sa komitibang gipanguluhan ni Rep. Manuel Zamora.
Pag-abot sa nasud sa Trinidad and Tobago, inay trabaho, prisuhan hinuon ang ilang gitugpahan human madiskubrehi sa mga awtoridad didto nga walay klaro ang ilang mga papeles.
Sa ikatulong congressional hearing niadtong Huwebes si Rep. Zamora mihagit sa POEA nga pahamtangan og silot ang maong placement agency.
“There is no reason for POEA to delay the releasing of sanction on the agency because of the inconsistencies we found in the documents. The committee could even give sanction to the agency right away,” matud pang Zamora.
Kahinumduman nga si Cebu 5th District Rep. Ramon “Red” Durano VI maoy mi-file og resolusyon didto sa Kongreso aron himuan og house inquiry sa gidangatan sa 23 ka OFW’s, matud pa niini nga nasamot ang kasakit nga gibati sa mga biktima human gilibkas sa POEA ang suspensyon batok sa BGWPA.
Si Durano maoy miabaga sa pletihan sa 23 ka mga OFW’s gikan sa Cebu ngadto sa Manila ug pauli aron makatambong sa matag hearing.
Katorse sa 23 ka OFW’s ang gikan sa Camotes Island nga ubos sa ikalimang distrito sa lalawigan hinungdan si Durano mimando sa POEA nga tangtangan og lisensya ang BGWPA.
“I have received reports that aside from the 23 Cebuano OFW’s, there are still other workers who experienced the same problem recruited by the same agency. Some opted to shoulder the fare to get home but the others remained in Tobago because they could not raise the plane fare amounting from P80,000 to P110,000, is this not enough for POEA to consider and suspend their license?” pangutana pang Durano.
Giimbitar unta sa committee ang tag-iya sa maong ahensya atol sa hearing apan ang ilang abogadong si Antonio Cabreros ra maoy mipatim-aw ug mipahibawong ang tag-iya sa BGWPA atua sa United States.
Imbitahon usab sa maong komitiba si Dr. Marie Magno-Agvani, honorary consul of the Republic of Trinidad and Tobago aron pahatagon og dugang katin-awan kinsa siya maoy unang representante sa gobiyerno nga nakig-istorya sa gobiyerno sa maong nasud.
Mipasalig si Durano paninguhaon niyang mahatagan gyud sa kung unsay ilang angayang madawat ang mga nabiktima.
Samtang si POEA-7 director Evilia Dorato mipasalig atol sa maong hearing nga mopagawas og desisyon human sa duha ka bulan kabahin sa hangyo sa komitiba batok sa maong ahensya. - Rey Pasaporte (BANAT NEWS)