Pro-life naglisod vs Reproductive Health Bill

CEBU, Philippines – Miangkong naglisod ang mga pro-life advocates sa ilang kampanya pagbabag sa kontrobersyal nga Reproductive Health Bill.

Kini maoy gipadayag sa country director sa Human Life International (HLI) nga si Rene Josef Bullecer nga nahinabi sa Banat News.

Giangkon ni Bullecer nga nadugangan karon ang mga kongresista nga nisuporta sa iyang gihulagway nga anti-life bill tungod kay sa bag-ong nanumpang mga kongresista gikan sa nagkadaiyang mga partylist groups pipila lang niini ang giingong nipaluyo sa ilang kawsa.

“Kay sa 30 ka mga partylist representative nga nadugang sa kongreso, unom ra niini ang anti-reproductive health ug kadaghanan pabor sa balaudnon,” sumala ni Bullecer.

Lakip sa giingon ni Bullecer nga misuporta sa nahisgutang balaudnon mao ang Sugbuanong si Pastor “Jun” Alcover sa ANAD partylist.

Subay niini gipahibawo ni Bullecer nga usa ka prayer rally ang ilang ipahigayon ugmang adlawa diha sa Fuente Osmeña Circle.

Nagkanayon si Bullecer nga ang maong kalihukan agi usab og pagsanong sa awhag ni Ricardo Cardinal Vidal pagpadayon sa ilang pakigbisog pinaagi sa pag-ampo.

Kini tungod kay giingong naninguha ang mga pro-reproductive health bill congressmen nga maaprubahan ang balaudnon sa dili pa ang ilang recess karong Hunyo 5.

Apan nagtoo ang mga pro-life advocates nga dako og matabang ang pag-ampo nga dili maaprubahan ang nahisgutang proposed measure.

Matud pa ni Bullecer nga libuan ka mga tawo ang ilang gipaabot nga motambong sa prayer rally ugmang adlawa nga panguluhan sa nagkadaiyang religious group.

Kini aron ipakita ngadto sa mga kongresista nga niduso sa nahisgutang balaudnon nga nagkadaghan usab karon ang nisupak niini.

Hugtanong gibabagan sa mga pro-life group ang Reproductive Health Bill tungod kay kini giingong usa ka kalapasan sa pagtulun-an sa simbahan.

Partikular na niini ang pagtugot sa balaudnon sa paggamit og mga contraceptive sama sa condom, pills, ug uban pang artificial birth control method. - Elly Bolonos (BANAT NEWS)