Natagak sa pangpang namatay

CEBU, Philippines - Usa ka ulitawo kinsa gituohang natagak sa pangpang gumikan sa kahubog, mitugpa kini sa sapa ug namatay didto sa sitio Calasa, barangay Colase, lungsod sa Samboan sa miaging gabii.

Ang natagak nailhan nga si Mario Binag, 24, taga barangay Camburoy, sa maong lungsod.

Sumala sa kapolisan sa Samboan nga nakadawat sila og taho gikan sa usa ka tawo nga maoy nakakita sa biktima nga nagbuy-od na nga wala nay kinabuhi didto sa daplin sa sapa sa Calasa.

Ang kapolisan nga misusi sa lawas sa biktima natahap nga hubog kining nagbaktas sa dalan sa tungang gabii ug dihang natapigas ang tiil niini sa pangpang nga may giladmong 5 metros mitugpa didto sa sapa ug dihang nalumos, nakabsan sa kinabuhi.

Hinuon padayon pang giimbistigar sa kapolisan ang maong hitabo kun wala ba patya og tuyo ang biktima ilabi na nga nangapangos ang nawong niini. - BANAT NEWS