10 ka dumptrucks gidakop sa NBI

CEBU, Philippines - Napulo ka mga dump trucks nga puno og balas ug graba ang gisakmit sa mga sakop sa National Bureau of Investigation niadtong milabay'ng adlaw'ng Huwebes sa gabii sa dakbayan sa Talisay.

Kini human usab makadawat og reklamo gikan sa mga opisyales sa Kapitolyo ang maong buhatan nunot sa naghitak nga pagpangubkob og balas ug graba sa Mananga River.

Kaniadto pa gidid-an ang pagpangubkob sa maong suba gumikan sa kapeligro niini sa mga residente nga nagpuyo duol niini ug ingon man ang epekto niini sa kinaiyahan.

Nangulo sa maong operasyon si Special agent Arnel Monsanto inabagan sa pipila ka mga opisyales sa Kapitolyo nga gipangulohan usab sa Provincial Treasurer nga si Atty. Rory Salubre.

Si Salubre mitumbok nga ubay-ubay nang mga reklamo ang nadawat sa ilang buhatan labot sa hilom nga pagpangubkob sa maong dapit.

Gikatahong sagad sa mamalit niini mga suppliers sa mga construction companies dinhi sa Sugbu.

Sa pagkakaron ang NBI padayon pang miila sa tinuoray nga tag-iya sa mga dumptrucks nga gitanggong karon sa ilang compound samtang giandam na ang kasong ipasaka batok kanila.

Lakip sa gidakop mao ang mga truck driver ug truck boy sa maong mga sakyanan. - BANAT NEWS