CEBU, Philippines - Susihon sa grupong DB8 of 8 (The Barangay of 8 Under Police Station 8) sa siyudad sa Sugbu ang kamatuuran sa gibutyag sa Mines and Sciences Bureau (MGB-7).
Ang director sa MGB-7 nga si Roger de Dios nipadayag nga pakyas ang mga barangay sa amihanang distrito sa dakbayan pagsumpo sa illegal hauling sa ilang dapit.
Kini bisan pa man kung dunay mga deputized agents sa mga barangay officials niini nga gitahasan pagpatuman sa Cebu City Mining Ordinance.
Partikular nga mga barangay nga ginganlan ni de Dios nga walay nahimo sa illegal hauling sa mga minerales mao ang Budlaan, Talamban, Pulangbato Bacayan, Pit-os ug Binaliw.
Ang nahisgutang mga barangay pulos mga sakop sa DB8 of 8 nga gipanguluhan na karon sa barangay kapitan sa Bacayan nga si Zenaida Colina.
Giangkon ni Colina nga dunay nagpadayong hauling sa pipila ka mga barangay nga sakop sa DB8 of 8 apan siya nagtuo nga kini dunay mga permit.
“Kung wala nay permit nang mga truck diha nga nag-haul mureklamo sab siguro nang mga kapitan nga hingtungdan,” nagkanayon si Colina.
Gipadayag hinuon sa chairperson sa DB8 of 8 nga atol sa ilang tigom karong Miyerkules sunod semana, kini iyang ipalakip sa agenda.
Gani mipasalig si Colina nga sila mohimo gilayon og tukmang lakang kung ilang masuta nga illegal ang gipahigayong extracting ug hauling sa mga minerales.
Partikular nga gikuha ug gihakot gikan sa pipila ka mga barangay sa amihanang distrito sa siyudad mao ang anapog ug uban pa.
Kahinumduman nga niadtong buwan sa Marso, kapin sa 20 ka mga opisyal sa DB8 of 8 ang nanumpa kang Mayor Tomas Osmeña isip mga deputized agents.
Kini subay usab sa hingpit nang pagpatuman sa Mining Ordinance sa dakbayan nga mag-regulate sa nagkadaiyang quarry operations sa siyudad.
Ang mga deputized agents gitahasan pagpaniid ug pagdakop sa mga illegal quarry operations lakip na sa paghakot og graba ug bas sa kasapaan sa dakbayan.
Apan matud ni de Dios nga siya wala makadungog nga dunay mga offender nga nadakpan ang nahisgutang mga deputized agents. - BANAT NEWS