Gipusil, gikulata kay milikay sa checkpoint

CEBU, Philippines - Mga sakop sa Cebu City Police Office (CCPO) ug mga Barangay Intelligence Network(BIN) gipasanginlang mikulata ug mipusil sa usa sa duha ka batan-ong milikay sa ilang checkpoint sa Salinas Drive sa barangay Lahug kagahapon sa kaadlawon.

Napusilan sa walang bukton si Ronnel Piañar, 24, taga sitio Panas Capitol Hills sa barangay Lahug ug naputos og bun-og ang kalawasan, samtang napangos sa tuhod ang iyang kaubang si Orlan Cortado, 21.

Sa report sa Homicide Section, si SPO4 Alex Dacua mibutyag nga gitawgan sila sa gwardiya sa Perpetual Soccour Hospital nga nagpahibalong dunay lalaking gihatud sa maong tambalanan nga napusilan.

Si Dacua nagkanayon dihang ilang nakahinabi si Piañar kini mitug-an nga gipusil siya sa wala mailhing mga awtoridad nga nagpahigayon og checkpoint sa Salinas Drive nianang tungang gabii dihang siya milikay sa checkpoint.

Sumala pa ni Dacua, base sa alegasyon ni Piañar gikulata siya sa mga BIN nga midakop kanila human siya mapusili ug misaliring ang ilang motorsiklo.

Gikatahong gidakop sila ug gidala sa ilang buhatan ug gihatud sa Cebu City Medical Center apan gipabalhin sila ngadto sa Perpetual Succour Hospital.

Si Insp. Juanito Pajantoy, Investigation and Detection Management Bureau sa pakighinabi sa mga tigbalita nagkanayon nga ilahang gigukod si Piañar human niini madumboli ang luyong bahin sa usa ka pribadong sakyanan atol sa ilang pagpahigayon og checkpoint diha sa Salinas Drive.

Mihimakak kining ilang gipusil si Piañar ug wala usab nila kini kulataha sanglit walay buto sa armas nga ilang nadunggan atol sa pag-ikyas sa duha.

Matud pang Pajantoy, mga estambay ang mikulata kang Piañar ug nagtuo siyang ang samad pinusilan niini daan na kini sa wala pa mabangga sa awto nga miresulta hinuon sa ilang pagkaaresto.

Nagtuo si Pajantoy nga napusilan nang daan sa laing dapit si Piañar maong wala niini panumbalinga ang checkpoint ug midiretso lang padagan hangtud nga nabangga.

Si Dacua mitug-an nga ilang imbestigahon ang pasangil ni Piañar sa mga polis ug sa BIN. - BANAT NEWS