'Bugoy' gibuk-an sa ulo

CEBU, Philippines - Gibuk-an sa iyang ulo ang usa ka gikatahong notadong “kawatan” ug “bugoy” sa usa sa mga bukirang barangay sa lungsod sa Sibonga niadtong milabay’ng udto samtang namista kini sa barangay Basak sa nahisgutang lungsod.

Ang kapulisan niila sa gipatay nga si Michael Sarona, ulitawo, taga barangay Manatad sa nahisgutang lungsod samtang wala pa mailhi sa kapolisan ang nagpatay niini.

Si SPO3 Lauron Padilla sa Sibonga Police Station nga gikahinabi sa Banat News nagkanayon nga usa ka wala mailhing suspetsado kalit lang milipot sa biktimang si Sarona kinsa nagbarog-barog daplin sa dalan atol sa pista ug gidul-itan ang luyong bahin sa iyang ulo sa pagpusil hinungdan nga milapos ang bala sa .45 kalibre sa iyang ilong.

Matud pa niini nga diha-diha nahagba ang biktima ug namatay samtang ang mamumuno nga wala mailhi sa mga tawo didto sa lugar daling miikyas palayo sa nahisgutang dapit ug wala na maabti sa mga miresponding mga polis.

Gituohan nga posibleng dunay mga tawong nasuko nga atraso ni Sarona tungod kay naila usab kining maldito, bugoy sa ilang barangay ug naila usab nga manghilabot.

Dugang pa ni SPO3 Padilla nga duna usay daghang mga residente sa nahisgutang lugar mipadayag nga nalambigit sa ilegal nga kalihukan si Sarona ingon man nalambigit usab kini sa pagpanulis sa ilang dapit.

Apan walay mireklamo niining mga residente ngadto sa kapolisan gumikan sa kahadlok nga kontrahan niini. - BANAT NEWS