Jonas way tagad sa shabu lab case

CEBU, Philippines - Si Dangerous Drugs Board Undersecretary Clarence Paul Oaminal miawhag karon ni Mayor Jonas Cortes sa dakbayan sa Mandaue pagtambong sa husay batok sa mga akusado sa mega shabu laboratory nga modepensa sa ilang kaugalingon karong Hulyo 2 ug 3 ning tuiga.

Si   Oaminal nga nahinabi sa Banat News mipadayag nga human iyang nabantayan nga   wala magpakabana ang mga opisyal sa dakbayan sa Mandaue labot sa maong kaso.

Sumala pa ni Oaminal nga si   Cortes maoy amahan sa maong dakbayan hinungdan nga angayan lang usab nga kini maoy mopresentar sa katawhan sa nahisgutang lugar.

Alang kaniya nga bating tan-awon kun ang mga tawong gikan pa sa ubang lugar mao na hinuoy nagpakabana sa problema sa drugas sa Mandaue nga tataw man unta nga ang mega shabu laboratory diha man sa nahisgutang lugar na-ronda.

Sumala pa niini nga angayan lang magpakabana sa matag husay ang mga opisyal sa Mandaue ingon man mga residente batok   sa 13 ka mga akusado sa mega shabu laboratory gumikan kay dako kaayong tamparos ang maong isyu sa ilang dapit.

Gipanghinaut ni Oaminal nga dili maghaguka ang mga opisyal ug mga   residente sa nahisgutang dakbayan sa pagpakabana sa maong kaso tungod kay dako’g nahimong kadaut sa ilang katawhan.

Nakita niini nga dili gyud aktibo ang kagamhanang lokal sa dakbayan sa Mandaue ubos sa pamunoan ni Cortes sa pagpakigbatok sa ilegal nga drugas sukad nabungkag ang shabu laboratory niadtong 2004. - BANAT NEWS