CEBU, Philippines - Gikatakdang i-deport karong adlawa sa BID- Manila ang Amerkanong giingong wanted sa Estados Unidos tungod sa pagpatay, nga gidakop sa mga operatiba sa immigration ug sa National Bureau of Investigation inabagan sa Diplomatic Security Services (DSS).
Si Gregory Howard Lanter, 51, tulo na ka tuig nga nagtagotago diha sa giabangang apartment sa barangay Cabangcalan dakbayan sa Mandaue.
Ang hiniusang grupo gipangulohan ni Aldwin Ty sa Law and Enforcement Division sa BI-Manila nakig-coordinate kang BI-7 Regional Director Casimiro Madarang III kabahin sa maong pinangitang tawo.
Nasuta nga nadakpan na kini nila kaniadto ug gitanggong sa Bicutan detention cell sa kaulohan (dapit nga prisohanan sa mga badlungong langyaw) apan kini nakaeskapo tulo na ka tuig ang nakalabay.
Si Lanter base sa record sa BI-7 miabot dinhi sa Sugbu niadto pang Pebrero tuig 2006 ug sa dakbayan sa Mandaue lamang kini nagtago, gikatahong walay nakapahibalo kanila kabahin sa iyang record maong wala kini dakpa kaniadto.
Giklaro hinuon niyang sa tulo ka tuig nga pagpuyo dinhi ni Lanter walay bisan usa ka reklamong ilang nadungog batok niini.
Si Lanter sa iyang bahin mipadayag nga gumikan sa inhustisya nga iyang naangkon sa kasong gipasaka kaniya sa US nakadesider siyang moikyas gikan sa Estados Unidos. - BANAT NEWS