Namatay naglingkod sa multicab

CEBU, Philippines – Usa ka lalaki nga patay na, nakit-an sulod sa usa ka multicab nga gi-parking sa daplin sa karsada sa barangay Looc, dakbayan sa Lapulapu kagahapon sa buntag. Ang ngalan niya mao si Angelito Mingote, alyas Lito, 30, ulitawo nga nagpuyo usab sa maong dapit.

Si barangay konsehal Wilson Budyongan sa barangay Looc mao mismo ang nakadiskubre sa patay’ng lawas ni Mingote nga naglingkod sa front seat.

Samtang si SPO3 Rex Ybanez sa homicide section sa kapolisan sa Mandaue mibutyag sa Banat News nga sa miaging gabii nakit-an nila nga naglingkodlingkod kini sa maong sakyanan apan nakurat nalang sila dihang nakita nila nga wala na kini kinabuhi sa pagkabuntag.

Gitino ni Ybañez nga walay foul play ang kamatayon sa biktima sanglit wala man sila makamatikod nga may tawo nga mipatay kaniya.

Hinuon si Ybañez miingon nga base sa gisugilon sa ama-ama, si Mingote may gihambin nga balatian gani nagbalik-balik lang kini sa hospital aron sa pagpatambal. Wala usab motug-an ang kapolisan sa klase sa sakit sa namatay. - Romeo T. Limpangog (BANAT NEWS)