Mga tunghaan susihon kun misunod sa fire code

CEBU, Philippines – Sugdan ugmang adlawa sa pagsusi ang nagkadaiyang mga tunghaan sa dakbayan sa Sugbu aron sa pagtino kung kini nakatuman ba sa nalatid sa building ug fire code.

Kini maoy gibutyag ni Konsehal Gerardo Carillo, ang chairman sa Committee on Education sa City Council ug pangulo sa gitukod nga Oplan Balik Eskwela sa siyudad.

Matud sa konsehal nga ang pagpahigayon og inspection maoy kabahin sa ilang gihimo nga mga pagpangandam sa subli usab nga pagbukas sa klase ugmang adlawa.

Gipadayag ni Carillo nga kadtong mga tunghaan nga ilang masuta nga dunay mga kalapasan sa fire ug building code, ila gilayong pasidan-an.

“Ato nang ipa-correct ug dili nila dayon makorihian then that’s the time nga atong hatagan og disciplinary action,” sumala ni Carillo.

Kahinumduman nga niadtong miaging tuig-tingtungha, ang grupo ni Carillo mipahigayon usab og inspeksyon sa pipila ka mga tunghaan sa dakbayan.

Nakita niining mga kalapasan naglakip sa kakuwang sa mga fire extinguisher, depektosong smoke detector, nababagan nga fire exit ug uban pa.

Gipadayag hinuon ni Carillo nga ang ilang gisusi kaniadto nga mga tunghaan dali usab nga mihimo og mga kausaban ug mopasabot sa ilang mga kalapasan.

Kini gidasunan usab sa labaw sa kabumberohan sa dakbayan nga si Superintendent Esmael Codilla kinsa sakop usab sa Oplan Balik Eskwela.

“Inig issue nato og notice to correct violations ma-pressure man pud sila kay nag-engage man gud sila og mga estudyante,” nagkanayon si Codilla.

Matud ni Codilla nga gawas sa gitakdang inspeksyon sa mga tunghaan nagpadayon usab ang kabumberohan sa dakbayan pagsusi sa mga lodging ug boarding houses sa siyudad.

Dugang niini miingon ang City Fire Marshall nga lakip sa ilang susihon mao ang ubang mga establisamento sa dakbayan nga sagad sudlan ilabi na sa mga tinun-an. - Elly Bolonos (BANAT NEWS)