Gikulatang reporter mokiha

CEBU, Philippines – Mibahad pagpasaka’g kasong kriminal ang reporter sa Sunstar Super Balita nga gikulata sa usa ka kanhi kagawad sa barangay nga giingong “bata-bata” sa mayor sa lungsod sa Barili niadtong May 17.

Si Joseph Elvir Tubilan, 33, residente sa barangay Poblacion, Barili ug usa usab ka kagawad sa maong barangay nakaangkon og mga bun-og sa kalawasan human giingong gikulata ug gipatid-patiran ni Marne Morales, 35, kawani sa Municipal Agricultures Office.

Si Tubilan nga mipa-blotter sa maong insidente mitug-an sa Banat News nga nitambong siya sa pista sa sitio Lysim nianang adlawa human gi-imbitar sa mga kabataan aron maoy motunol sa trophy sa Inter-Sitio Basketball Tournament.

Human niini nakig-estorya kaniya ang principal sa Dakit Elementary School nga si Gladys Balagtas apan gikatahong miduol si Morales nga nagpuyo atbang sa ilang gikahimutangan dayong singhag kaniya ug miingon “Kinsay nag-imbitar ni Marlon Garcia?” ug diha-diha gisukmag siya niini sa dughan ug gipatiran sa buko-buko.

Human niini mipa-blotter siya sa insidente sa police station apan wala nalang siya magpa-kurasyon, matud pa niya hubog si Morales nianang tungura apan si Tubilan miangkon usab nga nakatagay sad og gamay niadtong tungura.

Sumala pang Tubilan, si Marlon Garcia nga igsuon ni Gobernador Gwendolyn Garcia naatlan lang  diha sa sitio gumikan usab sa imbitasyon sa higala ug iyaha kining gipaapil sa pagtunol sa mga tropeyo isip igsuon sa gobernador.

Gihugun-hugonan nga si Marlon Garcia dunay posibilidad nga modagan pagkamayor sa maong lungsod pagya na usab nga ang mayor sa naasoy’ng lungsod di kaalyado sa gobernador. Nagduda karon si Tubilan nga posibleng kini maoy hinungdan nga giinitan siya ni Morales. Kasong “direct assault to a person in authority” maoy planong isang-at karong semanaha nga sumala pa ni Tubilan haom nga leksyon alang kang Morales. -Guam Logroño (BANAT NEWS)