Depositors sa Legacy mireklamo

CEBU, Philippines – Mireklamo ang mga depositors nga nabiktima sa nabangkarutang mga bangko sa Legacy dinhi sa Sugbu kay hangtod karon wala pa gihapon sila bayri sa Philippine Depositors Insurance Corporation (PDIC).

Sumala pa ni Jun Satures, hingkod ang panuigon, lumad nga taga dakbayan sa Mandaue ug usa ka negosyante mitug-an sa Banat News nga usa siya sa mga depositor nga gisaaran sa PDIC nga mahatagan na sila sa ilang kwarta nga nadeposito gikan sa bangko sa Legacy.

Apan hangtod karon wala pa gihapon tumana sa PDIC bisan pa man nakompleto na ang tanang mga papales nga naglangkob sa iyang orihinal nga passbook ug certificate of time deposit pagmatuod nga depositor diay sa nasira nga  Philippine Countryside Bank sa dakbayan sa Lapulapu ug Filipino Rural Bank sa dakbayan sa Mandaue.

Si Satures miingon nga nakadeposito siya og tunga sa milyon sa duha ka mga accounts ug gipasaligan siya sa PDIC nga makadawat lamang og P250 mil nga depositor’s insurance. 

Matud pa ni Satures nga nalipay unta siya sa dihang nakabasa og balita nga ang mga biktima sa Legacy dinhi sa Sugbu makadawat na sa ilang insurance gikan sa PDIC. - Chester Abadilla (BANAT NEWS)