Natulog sa kapilya gipatay

CEBU, Philippines – Gipusil ug namatay samtang nahinanok sa pagkatulog sulod sa kapilya ang usa ka 30-anyos nga lalaking namista sa sitio Cansagiring barangay Baring lungsod sa Carmen niadtong Huwebes sa alas 12:45 sa sayong kaadlawon.

Ang biktima mao si Wilfredo Hermoso Cambaya, molupyo sa barangay Sak-on sakop sa maong lungsod.

Matud pa ni SPO1 Danilo Laurente, imbestigador sa Carmen Police dihang nahinabi sa Banat News giingong namista sa maong lugar ug tungod kay nakainom na wala na makapauli hinungdan nga natulog nalang kini sulod sa kapilya sa maong lugar pagpalabay sa kagabhion.

Gituohang gidul-itan kini sa mamumuno base usab sa mga nakitang timailhan diha sa samad sa biktima.

Gikatahong dunay nakadungog sa maong buto apan dihang ilang giadto ang kapilya patay’ng lawas nalang sa biktima ang ilang naabtan.

Ang mirespondeng mga polis igo nalang naka-recover og usa ka kabhang sa bala sa kalibre .45 nga maoy gituohang gigamit sa suspek tupad sa patay’ng lawas sa biktima dapit sa ulohang bahin.

Ang kapulisan padayun pa sa ilang imbestigasyon pagtumbok sa suspek ug sa motibo sa maong pagpamusil nga una nang gidudahan nga usa ka paregla. - Darrel Carumba (BANAT NEWS)