Oplan balik eskuwela sugdan

CEBU, Philippines – Nangandam na ang mga sakop sa kapulisan sa dakbayan ingon man sa lalawigan sa Sugbu pagpatuman sa “Oplan Balik Eskwela” sa pagbukas na sa klase karong Hunyo sa sunod bulan.

Ang maong lakang gihimo subay sa kamandoan ni PNP chief director Jesus Versosa nga mimando sa tanang mga Police Regional Office lukop nasud paghulma sa ilang mga plano sa pagbukas sa klase karong sunod bulan.

Si Sr. Supt. Patrocinio Comendador ang hepe sa kapulisan sa dakbayan sa Sugbu ug Supt. Erson Digal sa kapolisan sa probinsya mimando na sa ilang mga sakop ug station chiefs sa pagduso og mga programa base sa ilang area of responsibility pagpangandam sa pagbukas sa klase.

Kini tungod kay dili ikalimod nga matag abli sa klase sa bulan sa Hunyo mosaka gyud ang nagkadaiyang krimen sa dakbayan ug sagad sa mga target mao ang mga tinun-an.

Si Digal mopabutang og mga police action center diha sa mga central schools sa kalungsuran ug component city.

Gawas niini gimanduan usab niini ang mga police chief nga pahugtan pagbantay ang mga bus terminals ingon man pantalan sa probinsya sa Sugbu diin daghan usab nga modagsang mga pasahero diin sagad niini nga estudyante. - Guam Logroño (BANAT NEWS)