Imbestigasyon vs. Shimura, Loot sugdan

CEBU, Philippines – Gipaabot nga sugdan karung sunod semana sa Hunta Probinsyal ang imbestigasyon sa kasong administratiba batok nila ni Daanbantayan Mayor Sun Shimura ug Bise Mayor Maria Luisa Loot.

Gibutyag ni Bokal Wenceslao Gakit nga karung Lunes tukion og balik sa sesyon sa committee report ang maong kaso nga namasangil sa duha ka opisyal nga nagpabaya pagpatuman sa programa sa Kapitolyo.

Ang maong mga pasangil may kalambigitan sa giingong wala pag- apod-apod sa mga gatas nga nangadaut nalang ug giingong ang wala paghikotar sa sakyanan sa Kapitolyo nga gidonar alang sa kapulisan.

Matud ni Gakit human nila matuki ug mahapsay ang mga lagda nga basihan, isunod unya dayun ang pagtakda sa fact finding investigation.

Hinuon si Mayor Shimura ug Bise Mayor Loot una nang mihimakak nga nagpabaya sila pagpatuman sa mga proyekto sa Kapitolyo diha sa ilang lungsod.

Kahinumduman sila si Provincial Social Welfare and Development Officer Marivic Garces ug General Services Office officer-in-charge Bernard Calderon maoy misang-at og reklamo batok nilang Shimura ug Loot ngadto sa Hunta probinsyal. - Rey Pasaporte (BANAT NEWS)