Mipalit og tuba giatngan gipusil

CEBU, Philippines – Kretikal ang kahimtang sa usa ka batan-ong lalaki nga gi-atngan sa dalan ug gipusil sa makaduha ka higayon samtang paingon na untang mopauli gikan gisugo pagpalit og tuba sa bukirang bahin sa barangay Gaang lungsod sa Tuburan niadtong miaging hapon. Ang biktima mao si Cerlito Malabo, 23, molupyo sa nahisgutang lugar samtang ang suspek o mga suspek wala pa gyud mailhi sa kapulisan sa paghimo ning balita.

Matud pa ni SPO1 Abel Delos Santos sa Tuburan Police dihang nahinabi sa Banat News nagbitbit ang biktima sa galon sa tuba dihang kalit gipusil. Ang biktima nga wala makabantay naigo sa iyang walang abaga ug giusban pa kini ug naigo sa aping, bisan pa samaron nakadagan kini palayo ug nakapangayo og tabang dayon gidala sa Tuburan District Hospital.

Ang barangay councilor na sa maong lugar nga si Esterlito Entero mao nay mitug-an sa kapolisan sa maong insidente, ang kapulisan padayun pang nag-imbestigar pagtumbok sa suspek o mga suspek nga responsabli sa krimen. - Darrel Carumba (BANAT NEWS)