Dynamite fishing sa Bien Unido padayon

CEBU, Philippines – Bisan og duna nay nangamatay sa dinamita padayon gihapon ang ubang mananagat sa barangay Bilangbilangan West ug East sa lungsod sa Bien Unido, Bohol sa paggamit niini.

Mga residente sa nahisgutang mga barangay dihang nahinabi sa Banat News mibutyag nga dunay mga mananagat sa ilang lugar nga padayong naniro gamit ang dinamita sa ilang pagpanagat tungod kay gusto nilang sayon ang pagpanagat ug dako ang abot.

Ang kasagaran nga panginabuhian sa mga residente sa lugar mao ang panagat, panguma ug pananom og mga guso ug sagad sa namuyo diha sa kasadpang bahin sa isla moabot sa 300 ka pamilya.

Si Mayor Niño Rey Boniel kinsa maoy tsirman sa Coastal Reinforcement Council sa pakighinabi miangkong problema gyud nila ang pagpanamita nga giingong binuhatan sa dili mga taga diha sa maong isla.

Ang mga masakpan ang pabayron og multa nga P2,500 ang kada tawo ug gamiton usab nila ang multa sa pagpalit og krudo aron magamit sa mga bangkang nagbantay sa ilang kadagatan.

Ang Bien Unido usa ka 4th class municipality nga gilangkuban sa 15 ka barangay diin aduna kini P35 milyones nga Internal Revenue Allotment (IRA) ug P5 milyones nga income matag tuig ug gamay lang ang magahin alang sa nahisgutang proyekto.

Usa usab sa ilang gisentro karon mao ang katumanan nga mahimong Marine Park ang mga parte sa ilang municipal water diin ang ilang gigamang municipal ordinance ang nasang-at na nila ngadto sa Sangguniang Panlalawigan.