3 ka babaye dam-agan trak sa Minglanilla

CEBU, Philippines – Tulo ka mga batan-ong babaye naangol human madasmagi og cargo truck ang motorsiklong gisakyan sa sitio Ogoy, barangay Veto, lungsod sa Minglanilla niadtong Miyerkules sa alas 5 sa hapon. Ang mga naangol mao ang drayber sa motorsiklo nga si Roxanne Nadela, 16, dalaga ug iyang mga ig-agaw nga magsuong Radel Abaquita, 17, ug manghod niining si Raquel, 16.

Samtang ang drayber sa cargo truck nga nakadasmag kanila mao si Willy Daven Oyangorin, taga lungsod sa Argao kinsa mitahan dayon human sa hitabo.

Matud ni PO3 Alfredo Pagaling sa Minglanilla Police dihang nahinabi sa Banat News, gikan sa barangay Veto paingon sa lungsod ang mga biktima ug pag-abot sa kurbadahong bahin sa maong lugar aksidente kining nadasmagan sa gikasugat nga cargo truck.

Gikatahong natumba ang motorsiklo ug silang tanan pulos nalamba sa sementadong karsada ug ang mga estambay na sa lugar maoy mitabang nila ug gihatod sa Minglanilla District Hospital.

Gisusi pa karon sa kapolisan nganong ang usa ka menor de edad nakamaneho man og motorsiklo sanglit ang hatagan lang og lisensya mao ra kadtong mga hamtong ang pangidaron. - Darrel Carumba (BANAT NEWS)