P1.3-milyones nakuha sa mga tulisan

CEBU, Philippines – Kapin sa P1.3 milyones   ang nasakiyo sa upat ka mga tulisan nga nagsakay’g motorsiklo human ilang natulis ang kolektor sa GP Dental Supply kagahapon sa alas 10:30 sa buntag diha sa eskina Sanciangko ug Leon Kilat, barangay Kalubihan ning dakbayan.

Si Supt. Jonathan Abella, hepe sa City Intelligence Branch (CIB) kinsa mao usab ang officer in-charge sa Investigation and Detection Management Branch (IDMB) nagkanayon nga usa ka Bonifacio Dayanan nga kolektor sa GP Dental Supply nga gipanag-iya sa usa ka Pamela Garshasbi nga nahimutang sa dalan Urgello, Sambag 2 ning dakbayan   mi-report sa Theft and Robbery Section (TRS) uban sa uyoan sa tag-iya nga si Willy Gerenia.

Sumala pa nga gikan si Dayanan ug Gerenia sa Bangko De Oro (BDO) nga nahimutang sa dalan Magallanes ning dakbayan sakay sa ilang motorsiklo nga (XRM YI-7388) sa dihang mopaingon unta sila sa ilang buhatan sa dalan Urgello, Sambag 2.

Apan sa dihang stop signal sa eskina Sanciangko ug Leon Kilat kalit lang mibabag ang usa ka motorsiklo sa ilang atubangan ug ang driver naka-helmet ug naka-bonnet ingon man ang angkas nga daling mikanaog.

Gikatahong daling mition sa armas ang maong angkas ngadto nilang Dayanan ug Gerenia samtang kalit usab nga miabot ang duha ka laing   wala mailhing tulisan diha nang daan sa isig ka daplin sa maong dalan ug mitabang sa pagtulis.

Matud pa nga ang suspetsado mikuha sa P57 mil   nga cash nga gibutang sa sling bag sa kolektor nga si Dayanan samtang ang kaubanan niini nagtion kanila dugang pag-ingon nga “baba baba” ug ang usa ka tulisan mikuha sa yawe ug gidala ang ilang motorsiklo diin didto sa U-Box ang P1.3 ka milyon.

Gikatahong nag-angkasanay pa ang mga tulisan sa dihang nanibat dala ang duha   ka motorsiklo agi sa Sanciangko paingon   ngadto sa Taboan ug wala na gyud kini maabti pa sa mga miresponding mga polis.

Dugang pa niini nga miabot lang og 5 minutos ang   pagpanulis nga walay komosyon ang nahitabo, apan mga 30 minutos pa ang milabay una na- report   ang insidente.

Si Sr. Supt. Patrocinio Comendador, hepe sa Cebu City Police Office nga miatubang sa mga sakop sa media kagahapon sa hapon diha sa iyang buhatan nagkanayon nga wala pa nila gisalikway nga   inside job ang maong hitabo.

Matud pa ni Comendador nga ila pang palawman ang imbestigasyon sa maong kaso ug sutaon kadtong mga tawong nakahibalo lang sa gidak-on sa kantidad nga gidala sa mga biktima.

Apan gibutyag niini nga dili mga propesyonal ang mga tulisan ug gihulagway lang niini nga mga “local boys” tungod sa estilo sa ilang modus sa pagtulis nga dili organisado gumikan kay naglakaw lang ang duha ka nagpaabot ug dayon giilog ang bag ingon man gidala ang motorsiklo. – BANAT NEWS