6 kawani nakuryentihan

CEBU, Philippines – Duha ka mga kawani sa Department of Engineering sa siyudad sa Carcar ang namatay ug laing upat pa ang nanga-angol human makuryentehi sa mainline sa CEBECO samtang nag-ayo sa gubaon nga puso sa Sitio Bonbon, barangay Ocaña, siyudad sa Carcar niadtong Lunes sa alas 3:30 sa hapon.

Ang namatay mao sila si Giovanni Taneo, ulitawo, molupyo sa barangay Ocaña ug Mark Vincent Pardillo,   minyo ug molupyo sa maong lugar ug pulos kawani sa Department of Engineering sa kagamhanan sa Carcar ug nadestino ubos sa Water Task Force Engineering Department.

Samtang ang laing upat nga nangaangol mao sila si Melvin Tanggaan, Christian Paras, Ulysses Panensoro ug Homer Alesna, pulos hingkod ang panuigon ug mga kawani sa maong buhatan.

Matud ni PO1 Gilmer Noval sa Carcar Police Station sa dihang nahinabi sa Banat News subay sa inisyal nga imbestigasyon nag-ayo sa gubaon nga puso sa barangay ang maong mga kawani sa lungsod ug sa dihang ilang gikuha ang tubo nga gilubong aron limpyohan sa dihang ila na unta kining gipabarug aron ibalik pagtaud aksidenti kining nisaghid sa mainline sa CEBECO ang tumoy niini hinungdan nga dihadiha nakuryentihan ang maong mga kawani.

Dunay pipila ka mga saksi ang nakakita sa hitabo nga nagkirigkirig ang duha ka mga namatay nga biktima hangtod nga nawad-an sa ilang panimuot samtang nalabay ang laing upat ka na-angol ug nakaangkon lang kini og mga ginagmay'ng paso.

Gidala dayon sa tambalanan ang mga biktima apan gideklarar nga patay na paghiabot sila si Taneo ug Pardillo samtang luwas na sa peligro ang upat ka mga kaubanan niini.

Nunot niini, gibasol dayon ni Carcar Mayor Patrick Barcenas ang management sa CEBECO tungod sa kamubo kaayo sa mainline niini sa maong lugar nga maoy hinungdan sa pagka kuryente patay sa iyang mga kawani nga unta 40 ka tiil man ang standard nga gitas-on niini gikan sa yuta ilabi na kay kusog kaayo ang boltahe sa maong linya.

Gituohan sa mayor nga gisuyop tungod sa kakusog sa boltahe ang maong tubo hinungdan nga misaghid ug nakuryentihan patay ang maong mga kawani.

Gimanduan dayon sa mayor ang konseho nga ipatawag ang atensyon sa CEBECO aron makurihe-an sa labing daling panahon ang pagpataas sa maong linya niini aron wala nay laing aksidente pa ang mahitabo. – BANAT NEWS