Nasunogan tabangan

CEBU, Philippines – Mohatag usab  og hinabang ang kagamhanan sa probinsiya sa Sugbu ngadto sa kapin sa 500 ka mga pamilyang nasunogan sa barangay Umapad dakbayan sa Mandaue.

Sumala pa ni Provincial Social Welfare Officer Marivic Garces nagkanayon nga si Governor Gwendolyn Garcia mihatag og kamanduan nga hatagan og hinabang financial ang mga nabiktima.

Si Garces miingon nga hatagan og mga kagamitan sa balay ang mga biktima nga posibleng direkta nilang itunol sa mga biktima.

Kini mahimong ipuno na lamang sa matunol nga hinabang sa kagamhanan sa siyudad sa Mandaue kinsa mideklarar na sa barangay Umapad nga ubos sa state of calamity tungod sa maong sunog.

Nasayran nga miabot sa 506 ka mga pamilya ang nawad-an sa ilang panimalay human naugdaw sa sunog nga miigo sa sitio Lemonsito ug Manggo barangay Umapad niadtong adlaw nga Domingo.

Mikabat sa P2.8 milyones ang gibanabanang danyos sa pag-ugdaw sa 280 ka mga balay.

Si Barangay Kapitan Zaldy Lumapas sa gihimong special session sa konseho nagkanayon nauyonan nga ipagawas ang calamity fund sa ilang barangay, samtang si Bise Mayor Carlo Fortuna sa pakighinabi sa Banat News mibutyag nga mao usab ang ilang gihimo karon sa konseho.

Gibana-banang mokabat sa P5 mil ngadto sa P8 mil ang kantidad sa mga housing materials nga ipang-apod kanila. - Chester Abadilla uban sa report ni Romeo Limpangog (BANAT NEWS)