Tinun-an gikulata, gipusil patay

CEBU, Philippines – Nagbuy-od na sa dalan ang usa ka menor de edad ug naputos sa samad pinusilan ang kalawasan dihang napalgan pasado alas 4 sa buntag kagahapon sa kaadlawon sa MJ Cuenco Avenue sa barangay Mabolo.

Ang patay’ng lawas nailhan nga Edwin Daño,17, first year high school student sa Florencio Urot National Night High School ug taga dalan F. Gil Tudtud sa samang barangay.

Samtang wala pa mailhi sa kapolisan kung si kinsa ang mamumuno sa maong batan-on apan gidudahang may kalambigitan kini sa panag-away sa mga ribal nga gang sa maong dapit.

Sa gipahigayong pakisusi sa Crime Scene Investigation Unit (CSUI) nga gipanguluhan ni SPO1 Sylvanus Abella ug kaubanan giingong dunay samad pinusilan sa walang bahin sa lawas nga milapos sa pikas nga bahin ang bikima ug maoy gidudahang hinungdan sa hinanali niining kamatayon.

Gikatahong dunay kauban ang biktima nga giila lang sa pangalan nga “Opaw” samtang nanglakaw sa nahisgutang lugar dihang kalit nga mibutho ang wala mailhing mamumuno ug gikalitan og pusil si Daño.

Gidudahan usab sa kapolisan nga gitabangan kini og kulata sa wala pa patya gumikan sa mga nakitang bun-og sa kalawasan. - Lesley Caminade (BANAT NEWS)