CEBU, Philippines - Gipanghingusgan karon sa kapolisan sa dakbayan sa Mandaue ang paggukod sa mga karnaper nga manakiyo og motorsiklo kansang mga kinawat adto ibaligya sa ilang suki didto sa barangay Pandan sa lungsod sa Sibonga.
Usa sa paagi karon sa kapolisan mao ang pag-checkpoint magabii nga maoy gimando ni Senior Superintendent Orlando Ualat, hepe sa kapolisan dakbayan sa Mandaue human masikop si Joel Jubay, 23, nga taga Mambaling, dakbayan sa Sugbo sa miaging adlaw.
Nadakpan si Jubay dihang karnapon na unta niini ang motorsiklo ni Ricardo Flores, 44 , minyo, nga taga barangay Looc, dakbayan sa Mandaue.
Si Jubay dihang giimbistigar, mitug-an sa kapolisan nga kauban siya sa grupo sa mga tulisan ug karnaper sa motorsiklo nga nia maglihok sa lalawigan sa Sugbo.
Ang iyang mga kauban pulos taga dakbayan sa Dumaguete kinsa batid kaayong mangiriw sa motorsiklo ug ang ilang kinarnap adto usab nila iariya sa ilang suking tigpalit niini kinsa usa ka negosyante nga taga Pandan, Sibonga.
Hinuon ang mga sakop sa kapolisan sa Sibonga, naniid na niining maong negosyante sa pagkakaron. - Romeo T. Limpangog (BANAT NEWS)