Plastic factory gisusi sa DENR

CEBU, Philippines - Ang kagamhanan sa dakbayan sa Talisay uban sa taga Department of Environment and Natural Resources (DENR) misusi niadtong Biyernes sa usa ka plastic factory sa sitio Pang-pang, barangay San Isidro, sa maong dakbayan.

Kini agi’g tubag sa reklamo sa mga molupyo sa maong lugar batok sa ISJ Plastic Center gumikan sa naghinobra kabaho sa ilang masingo gikan sa maong pabrika.

Sa sayo pa namatud-an ni Konsehal Bernard Odilao, kinsa maoy tsirman sa komitiba sa kalikopan sa konseho sa Talisay, nga wala makatuman sa mga gimando sa balaud nga panginahanglan aron kini makapamatigayon sa maong lugar.

Kini human ipahigayon ni Odilao uban sa ubang mga opisyal sa dakbayan sa Talisay ang pag-inspection sa maong pabrika sa miaging semana.

Si Odilao sa pakighinabi niini sa Banat News mibutyag nga siya maoy mihangyo ngadto sa buhatan sa DENR nga ipa-inspection ang maong pabrika.

Sa inspection nga gihimo sa taga DENR sa ISJ Plastic Center niadtong Biyernes, nasuta ang permiso nga giaplayan sa maong pabrika dili pagpanghimo og plastic kundili mao ang storage ug segregation sa mga scrap nga plastic.

Hinuon si Odilao nagkanayon nga lapas sa 15 diyas nga gilugway niya sa maong pabrika sa pagtuman sa tanang gipangayo sa gobiyerno aron kini makapadayon sa negosyo, pasirhan na gyud kini kun mapakyas sa pagtuman sa mando. - Brenda D. Batuto (BANAT NEWS)