CEBU, Philippines - Gikabalak-ang walay tubig ug suga ang Mandaue City College (MCC) nga gidumala ni Dr. Paulus Marie Cañete sa Jagobiao campus inig-abli sa klase karong Hunyo 1 kay wala kini kabayad sa kaping P700 mil nga bayranan sa kuryente ug tubig.
Ang Eversely Child Sanitarium Hospital(ECSH) nga maoy tag-iya sa edipisyo nga giukopahan sa MCC dili usab manginlabot sa maong bayranan.
Si Dr. Susana Madarieta nga maoy regional director sa Department of Health (DOH) 7 miingon nga bisag magkinaunsa, dili mobayad ang ECSH nianang bayranan sa kuryente ug tubig tungod kay ang MCC maoy naggamit niini ug walay labot ang tambalanan.
Gani midugang si Madarieta nga kinahanglang magbaton og kaugalingong metrohan sa kuryente ug tubig ang MCC ug mobayad kini og tinarong sa iyang abangan ngadto sa ECSH nga maoy tag-iya sa bakanteng edipisyo nga giokupahan sa maong eskuylahan.
Sa nasayran , ang maong tulunghaan nga gidumala ni Cañete nag-abang sa maong edipisyo nga iya sa ECSH sukad pa niadtong Abril 2008.
Kini sa dihang gihinginlan sila gikan sa edipisyong gigamit nila sa barangay Ibabao kay gipagamit para sa National Science High School. - BANAT NEWS