3 ka sundalo patay sa ambush sa Negros

CEBU, Philippines - Tulo ka mga sundalong sakop sa 11th Infantry Battalion sa Philippine Army ang nakalas human banhigi sa gibana-banang napulo ka mga gidudahang rebeldeng New People’s Army sa sitio Busay sa barangay Hilaitan, Guihulngan, Negros Oriental niadtong Sabado sa buntag.

Ang mga biktima giilang sila si Pfc. Joey Bajon, Pfc. Reno Gonzaga ug Pfc. Leovigildo dela Torre,Jr. nga pulos mga sakop sa Mass Base Operation Platoon, Bravo Company sa nahisgutang batalyon.

Samtang nakalingkawas usab sa maong pagpamanhig si Pfc.Joey Galagate ug duha ka mga drayber sa habal-habal nga ilang gisakyan human daling nakanaog sa motorsiklo ug nanagan palayo sa namanhig.

Sumala pa sa report nga miabot sa 3rd Civil Relations Group sa Central Command padulong sa lungsod ang upat ka sundalo aron mokubra sa ilang mga sweldo.

Apan pag-abot sa nahisgutang dapit gikatahong gibabagan sila sa mga armadong mga lalaki ug kalit gipaulanan og bala, gumikan kay pulos sila nakasibilyan ug walay mga dalang armas walay nahimo pagsukol ang mga biktima.

Si Pfc. Galate ug ang duha ka mga habal-habal drivers daling mikaratel og dagan ug misumbong sa mga awtoridad apan sa pagbalik sa mga sundalo sa dapit, mga patay’ng lawas nalang sa tulo ka mga kauban ang ilang naabtan.

Ang mga sakop sa Bravo Company sa 11th IB daling milusad og hot pursuit operation batok sa mga rebelde, wala hinuon pa matino kung kang kinsang pundok sa mga NPA ang mibanhig sa mga sundalo.

Si Lt. Col. Oscar Lasangue, Group Commander sa 3rd CRG mikondena sa gibuhat sa mga NPA sa mga sundalong walay ikasukol niadtong higayuna.

Ang mga patay’ng lawas sa tulo gidala na sa Villegas Funeral Homes sa Guihulngan alang sa awtopsiya.

Ang AFP naninguhang mapapas na ang insurhensya sa nasud sa dili pa matapos ang termino ni Presidente Gloria Macapagal Arroyo karong 2010. - Edwin Ian Melecio (BANAT NEWS)