Ulitawong nangabit og minyo gipriso

CEBU, Philippines – Usa ka 35 anyos nga ulitawo ang gipriso sa kapolisan human kini hisakpi nga nagbuhat og ilegal nga butang tali sa usa ka babayeng minyo didto sa barangay Pooc, dakbayan sa Talisay niadtong Biyernes sa gabii.

Ang suspek nga si Rolando Tumulak, 35, nga taga sitio Libo, barangay Mohon wala ka-eskapo dihang naabtan kini sa mga barangay tanod kauban sa usa ka babayeng minyo, kansang ngalan gitago.

Natultolan sa mga otoridad sa barangay ang dapit nga gitagoan sa suspek ug sa uyab niini dihang ang anak sa babaye (kansang ngalan wala ibutyag) maoy migiya sa mga tanod.

Nasayran sa kapolisan nga ang cell phone sa babaye nga gikakuyog ni Tumulak maoy naggiya sa anak niini pagtultol sa dapit diin sila hidakpi.

Mibutyag ang anak nga duha na ka tuig niyang paniid sa relasyon sa iyang inahan ug ni Tumulak ug niadto pang Biyernes niya hiabti ang duha nga naghimo og buhat nga dili angayan nilang buhaton.

Duha gipamusil nangaangol

Duha ka tawo ang naangol sa pagpamusil nga nahitabo sa mga dakbayan sa Lapulapu ug Mandaue sa miaging gabii.

Ang mga biktima mao sila si John Paul Lobiano, 25, ulitawo, mangingihaw og baboy nga taga sitio Ihawan , barangay Pusok, dakbayan sa Lapulapu, ug si Danilo Villacielo, hingkod nga taga barangay Looc, dakbayan sa Mandaue.

Ang mipusil kang Lobiano nailhan lang sa ngalang Atil nga walay klarong address, samtang ang kang Villacielo, nailhan lang nga Sony Boy nga iya ra usab nga silingan.

Sumala sa kapolisan nga si Atil sa wala pa pusila si Lobiano didto sa giinoman nilang tindahan sa Pusok, dakbayan sa Lapulapu, puwerti kunong nakahingos og rugby niini, samtang si Villacielo nakig-inom usab sa iyang higala didto sa sitio Paradise , Looc, dakbayan sa Mandaue dihang kalit lang mitungha ang wala hiilhing tawo nga miluthang kaniya.

Nasalbar ang duha ka biktima kay nadala dayon kini sa tambalanan samtang ang nakapusil kanila pulos nakasibat. - Romeo T. Limpangog (BANAT NEWS)