Sex scandal video naa sad sa 'piso-piso'

CEBU, Philippines – Gawas sa mga internet cafés nga abangan og P10 ngadto sa P30 matag oras, hasta ang ‘piso-pisong’ video games sa mga suok-suok nga konektado sa internet mahimo maka-access na sa kontrobersyal nga Dr.Hayden Kho ug Katrina Halili sex video.

Niadtong Biyernes sa gabii, gironda ug gikumpiskar sa mga sakop sa sudlonong bahin sa Citicenter sa barangay Kamagayan human makadawat og reklamo sa mga residenteng dunay nanan-aw niini (sex video) ug apil sa nag-apong mga bata.

Si Chief Insp. George Ylanan, hepe sa Investigation and Detective Management Branch (IDMB) nga gikahinabi sa Banat News nagkanayon nga niadtong Biyernes sa gabii nakadawat sila’g tawag sa usa ka concerned citizen nga gihilasan sa gipanghimo sa maong pundok.

Gikatahong ang maong caller misumbong nga kasagaran sa mga nanan-aw sa maong sex video mga minor de edad uban sa mga hamtong.

Sila si SPO1 Filomeno Mendaros ug mga kaubanan daling nisuhid sa nahisgutang dapit aron pagkumpirmar ang report ug mao nalay ilang naabtan ang dili momenos 25 ka mga tawo ug mga bata nag-apong sa usa ka “piso-pisong” computer unit.

Apan una pa makaduol ang mga polis dunay nakabantay sa ilang presensya hinungdan nga nagkatibulaag ang pundok lakip na mga bata hinungdan nga wala silay bisan usang nadakpan. Usa sa mga mirondang polis nga gikahinabi sa Banat News nagkanayon nga nagsalida pa ang maong sex video hinungdan nga ilaha kining gisakmit. Ang maong computer unit nga kolor oranges adunay kompletong gadgets sa computer box, TV monitor, mouse, keyboard ingon man CPU nga konektado sa internet.

Giingong ang caretaker niini ginganlan lang og “Roy” apan wala kini madakpi sa kapolisan ug naglisod usab ang kapolisan pagtumbok kaniya gumikan kay nagdumili pagtug-an ang mga residente sa nahisgutang lugar.

Matud pa ni Ylanan nga specific ang ilang target, kadto rang mga units nga nagpasalida’g mga malaw-ay’ng palabas mao ra gyud ang ilang sakmiton sanglit kalapasan kini sa Presidential Decree 969 ingon sa ordinansa sa dakbayan.

Samtang sa laing operasyon pagsakmit sa maong sex videos sa kapulisan sa dakbayan sa Talisay niadtong Biyernes diha sa barangay Tabunok nakakuha sila og 14 ka kopya niini. Ang nahisgutang pagpang-ronda natigayon human nihangyo si Konsehal Shirley Belleza ang tsirman sa komitiba sa kababayen-an ug kabataan ug pamilya. - Uban sa report ni Branda Batuto (BANAT NEWS)