Suspensyon ni Castro buot nga mapatuman

CEBU, Philippines – Ang Office of the Special Prosecutor sa Sandiganbayan pinaagi ni Assistant Special Prosecutor III Pamela Baring-Uy ug Acting Director, Prosecution Bureau II Rodrigo Coquia miduso og motion niadtong adlaw’ ng Biyernes pag-aghat sa Sandiganbayan nga ipatuman ang 90 ka adlaw nga preventive suspension batok sa kontrobersiyal nga piskal Mary Ann Castro sa Cebu City Prosecutor’s Office.

Sumala pa nila sa unom ka pahinang mosyon niadto pang Abril 11, 2005 gipagawas sa Sandiganbayan ang kamanduan ngadto ni Justice Secretary Raul Gonzales ug Cebu City Prosecutor Nicolas Sellon nga ipaubos sa tulo ka bulang preventive suspension si Castro.

Si Castro nag-atubang kaniadto og kasong bribery tungod sa pasangil nga midawat sa P20 mil nga suborno gikan sa abogado sa gipasanginlang druglord, ang maong druglord giabswelto sa korte sa kasong giatubang.

Tungod sa pagdumili si Sec. Gonzales ug Sellon sa pag-implementar sa kamanduan sa korte sa makadaghan nga higayon, si Baring-Uy ug Coquia subling nanawagan sa Sandiganbayan nga pugson ang DOJ ug Cebu City Prosecutor’s Office sa pagpatuman sa 90 ka adlaw nga suspension batok ni Castro. - Chester Abadilla (BANAT NEWS)