Negosyante gidid-an pasobra'g ginansiya

CEBU, Philippines – Nanawagan si Cebu City Councilor Arsenio Pacaña ngadto sa mga negosyante sa dakbayan partikular na sa namaligya og mga school supplies nga dili magpatuyang sa paginansya sa ilang mga baligya.

Kini samtang nagsugod na og pamalit ang mga tinun-an sa ilang mga kagamitan alang sa pagbukas sa klase karong sunod buwan.

Ang konsehal nga maoy chairman sa Committee on Trade sa City Council miingon nga angayang hunahunaon usab sa mga negosyante ang krisis nga padayong nasinati karon sa katawhan.

Matud pa ni Pacana nga awhagon usab niya ang Department of Trade and Industry (DTI) nga monitoron ang presyo sa mga school supplies.

Kini aron walay kahigayunan ang mapahimuslanong mga negosyante pagpaburot sa presyo sa ilang mga baligya.

Sa samang higayon miingon si Pacaña nga iyang isugyot ngadto kang City Administrator Francisco “Bimbo” Fernandez ang pagbanhaw sa Local Price Monitoring Council (LPMC).

Ang City administrator maoy chairman sa LPMC sa siyudad nga gilangkuban usab sa mga representante sa nagkadaiyang ahensya sa kagamhanan.

Buot ni Pacaña nga mutabang ang kagamhanan sa dakbayan sa pag-monitor sa presyo sa mga school supplies nga gipamaligya karon sa nagkadaiyang tindahan.

Wala pa hinoon makadawat og reklamo ang konsehal gikan sa mga pumapalit kalabot sa gipaburot nang presyo sa mga kagamitan sa tunghaan.

Apan gitataw ni Pacaña nga dili angayang paabuton pa nga adunay motumaw nga mga reklamo ug kinahanglang karon pang daan molihok na sila ilabi na ang hingtungdang ahensya. – BANAT NEWS