Reklamo sa kapitan giimbestigar

CEBU, Philippines – Gisugdan na og imbestigar sa hunta probinsiyal ang reklamo sa mga barangay kapitan sa lungsod sa Consolacion kinsa mireklamo batok sa konseho sa maong lungsod kay gilangay niini ang pagpasar sa ilang budget alang ning tuiga.

Ang maong reklamo gikan na sa buhatan sa Ombudsman Visayas nga maoy unang nakadawat niini ug miindosar sa mao usab niini ngadto sa buhatan ni Vice Governor Gregorio Sanchez aron maoy paimbistigahon sa maong reklamo.

Nasayran nga ang kinabag-ang mga barangay kapitan sa lungsod sa Consolacion naghiusa sa pagpasangil sa finance committee chairman sa konseho sa maong lungsod nga mao kuno’y mituyo paglangay sa pagpasar sa maong budget.

Unya midugang sila nga matud pa wala lang usab kuno kini badlonga ni bise mayor Joel Quinio aron dili madawat sa mga opisyal sa barangay ang mga ayuda nga gitagana ni Mayor Ritchie Wagas sa maong lungsod.

Apan nangatarungan si bise mayor Quinio nga daghan pang tukionon sa mga items sa maong annual budget nga angayan nga ipasabot ni Mayor Wagas hinungdan nga nalangay ang pagsagop nila sa maong budget. - Chester Abadilla (BANAT NEWS)