CEBU, Philippines – Gibaharan sa kagamhanan sa dakbayan sa Sugbu nga kadtong mga sakyanan sa gobiyerno nga dili ma-renew ang rehistro dili hatagan og gasoline.
Matud ni City Administrator Francisco “Bimbo” Fernandez nga kinahanglang ipa-renew gyud sa matag hepe sa departamento nga maoy gipiyalan sa sakyanan sa kagamhanan sa pagparehistro gyud og tinarong sa maong mga sakyanan aron may libre silang gasoline.
Ang inistrikto nga paagi karon sa paghatag og gasoline allowance ngadto sa mga sakyanan sa gobyerno gipatuman human ang usa ka deputized agent sa Land Transportation Office (LTO-7) mitaho sa Banat News nga matud pa adunay daghang mga sakyanan nga gipanag-iya sa City government nga nagdagan karon kansang rehistrasyon nabahas na.
Gipadayag sa tinubdan nga dili lang sila makaako pagdakop sa nahisgutang mga sakyanan tungod kay kini gipanag-iya usab sa gobiyerno.
Ang Officer-In-Charge sa General Services Office (GSO) nga si Lorna Logico miingon hinuon nga padayon nilang gipahimangnoan ang gipanghatagan og sakyanan sa dakbayan.
Giklaro hinuon ni Logico nga ang buhatan na nga gihatagan sa dakbayan og sakyanan maoy manubag kung kini makahimo og bisan unsang traffic violations.
Ang City government dunay gatusan ka nagkadaiyang matang sa mga sakyanan nga gipagamit sa nagkadaiyang mga buhatan lakip na sa kapulisan sa dakbayan. – BANAT NEWS