Paghinay sa NPA vs. AFP di kakumpiyansahan - Bantay

CEBU, Philippines – Ang gikatahong paghinay sa mga rebeldeng New Peoples Army dili angay kumpiyansahan sa kasundalohan, sumala pa sa usa sa mga magbabalaod.

Si Bantay Partylist Representative Jovito Palparan nga nahinabi sa Banat News sa Tapok-Tapok sa Kia Gorordo sa dakbayan sa Sugbo kagahapon miingon nga ang paghinay sa mga operasyon sa armadong pakigbisog sa mga NPA posibleng usa ra ka taktika.

Si Palparan, kanhi pangulo sa intelligence unit sa AFP kaniadto nagkanayon nga mamahimong mi-lie low lang ang maong grupo ug migamit og taktikang makigsuod sa katawhan isip pamuhunan sa sunod nilang pagpakusog sa pwersa.

Si Palparan makadaghang higayon nga gipasanginlan sa mga militanteng pundok ug human rights groups nga maoy utok sa mga pagpatay sa mga militanteng lider, apan kini iyang gipanghimakak tanan.

Gihulagway kini ni Palparan nga “black propaganda” aron siya dauton.

Sa laing bahin, si Tuburan mayor Constancio Suezo III mibutyag nga ang mga imprastrakturang gipasiugdahan sa gobiyerno dako og natabang sa pagkawagtang sa insurhensiya.

Hinungdan nga dili na kaayo mahadlok ang katawhan ug midaghan na hinuon ang nanguma tungod kay dali nalang ang paghatud sa ilang abot sa kamerkaduhan. - Romeo Limpangog uban sa report ni Chester Abadilla (BANAT NEWS)