Papa patay sa aksidente

CEBU, Philippines – Patay diha-diha ang usa ka amahan samtang samdan ang anak nga angkas niini human magkabangga sa usa ka Toyota Hilux nga gipanag-iya sa Smart Communication Incorporated pasado alas 3 sa miaging adlaw sa sitio Looc barangay Bato syudad sa Toledo.

Si Wilfredo Francisco, 50, residente sa maong dapit, namatay diha-diha samtang ang anak niining si Markwil Francisco,26, padayon pang giatiman sa tambalanan.

Ang drayber sa maong pickup giilang si Roniel Jaropjop,24, taga dalan sa Osmeña Drive sa barangay Labangon dakbayan sa Sugbu.

Matud pa ni PO3 Julius Sanchez, traffic investigator sa syudad sa Toledo nga ang mga biktima padulong nang mopauli.

Sa dihang nagkatagbo ang duruha sa nahisgutang lugar ang Toyota Hilux nga misuway unta sa pag-overtake sa laing sakyanan apan nabanggaan niini ang gikasugat nga motor.

Ang drayber kasamtangan karun nga natanggong sa Toledo Police station samtang nagpaabot sa kaso nga iyang atubangon. - Lesley Caminade (BANAT NEWS)