CEBU, Philippines – Nagpailang pari gidakop sa kapulisan sa lungsod sa Naga human mabistong usa ra diay kini ka sakristan sa mga parokyanong iyang gimisahan niadtong Huwebes sa hapon.
Apan ang pagkabisto sa iyang pagpakaaron-ingnong pari milanat pa og usa ka semana sa kapilya sa barangay Cogon sa nahisgutang lungsod ug nianang mga adlawa nakatigum siya og mga limos gikan sa mga tawo.
Ang gidakop ug gibalhog mao sila si Al Mark Pelimer, 24, minyo, taga Pitalo, San Fernando, gidakop usab ang kauban niining si Sopriano Basalan, 23, taga Cogon, Naga kinsa nagpaila usab nga sakristan ni Pelimer.
Si Supt. Anthony Bagarinao ang hepe sa Naga Police Station nga nahinabi sa Banat News nagkanayon nga ilang gisikop si Pelimer diha sa iyang gitrabahoan sa barangay Mambaling ug gisikop usab si Basalan sa follow-up operation.
Usa sa iyang mga kauban sa trabaho maoy usa sa nakatambong sa misa ni Pelimer sa kapilya sa barangay Cogon ug nakugang nga pari na diay ang iyang kaubang trabahador sa buhatan og goma sa Mambaling.
Matud pa ni Bagarinao nga giduol sa kaubang trabahante si Pelimer human gyud sa iyang ‘misa’ niadtong Huwebes ug gipangutanang “Pari na diay ka?” Kini maoy hinungdan nga nahingangha ang mga nanimba.
Sumala pa nga nakahipos ug kapin sa P2 mil nga koleksyon si Pelimer ug Basalan sa ilang pagpahigayon og misa sulod sa usa ka semana sa nagkadaiyang sitio sa nahisgutang barangay.
Gikataho usab nga nakapahigayon pa usab kini og “blessing” sa usa ka bag-o pang gihimong panimalay ug gibayran og P500.
Nasayran ni Bagarinao nga kanhi altar boy kaniadto si Pelimer maong nasuhito sa buhaton sa pari.
Ang duha ka mga akusado ang gibuhian hinuon kagahapon sa alas 9:00 sa buntag dihang ang kura paroko sa nahisgutang lungsod ang matud pa mipadangat og komunikasyon ngadto sa mga opisyal sa barangay nga pasayluon nalang ang duha sa ilang nahimo. - Guam Logroño (BANAT NEWS)