Bisan nakasulod na ang AH1N1 Sugbu pabiling luwas gikan sa virus

CEBU, Philippines – Pabiling luwas ang Sugbu gikan sa makamatay nga sakit nga AH1N1 virus bisan paman sa balitang duna nay usa ka kasong nakasulod dinhi sa nasud diha agi sa Manila.

Ang Department of Health ug monitoring teams sa Mactan International Airport miingon nga walay angayang ikabalaka ang mga Sugbuanon tungod kay walay bisan usa sa 11 na ka mga tawong gisuspetsahang may AH1N1 virus dinhi ang migawas nga negatibo.

Giawhag hinuon nila ang publiko nga kinahanglang magpabilin ang higpit nga pagsunod sa mga precautionary measures sama sa pagpanglimpiyo sa panglawas ug uban pa.

Usa ka 10-anyos nga batang babayeng taga Luzon ang nataptan sa maong virus nga gikan pa sa Estados Unidos ug sa Canada ug miabot niadtong Mayo 18.

Ang maong bata kasamtangan nang giatiman sa mga doctor samtang gipangita na usab ang 17 pa ka ubang mga tawong nakasakay niini diha sa abyon pag-abot dinhi sa nasud. Ang inahan sa maong bata ang unang gipaubos sa eksaminasyon apan negatibo ang resulta.

Sa laing bahin, si Presidente Gloria Arroyo ang miluwat og kamanduan dili lang ngadto sa departamento sa panglawas apan lakip na sa tanang ahensiyang hingtungdan nga magkahiusa sa pagpahigayon sa kampaniya batok sa maong virus.

Sa sayo pa ang presidente nagkanayon nga ang gobiyerno sa nasud ang andam nga mag-apod-apod og usa ka milyon nga kapsula sa Tamiflu nga maoy pangsangga sa nahisgutang virus.

Midugang kini nga ang information materials ang naandam na alang sa pag-apod-apod sa maong medisina ngadto sa nagkalain-laing probinsiya. - Brenda Batuto (BANAT NEWS)