TV program sa Kapitolyo worldwide na

CEBU, Philippines – Matan-aw na sa tibuok kalibutan ang television program sa Kapitolyo human mapirmahi ni Governor Gwendolyn Garcia ang usa ka Memorandum of Agreement kon MOA tali sa National Broadcasting Network kon NBN.

Si Garcia ug Jose Isabelo, ang Network General Manager sa The People's Television Network, Inc. kon PTNI ug naila usab nga NBN nagpinirmahay sa MOA.

Ang NBN 11-Cebu mo-air sa 30 minutos nga television program sa Kapitolyo nga nagpakita sa mga napatuman ug nahumang programa ug proyekto sa kagamhanan sa probinsiya sa Sugbu gikan sa alas 8:00 hangtud na sa alas 8:30 sa buntag kada adlaw gikan sa adlaw nga Lunes hangtud sa adlaw nga Biyernes.

Duna kini replay sa nationwide broadcast nga libre sa alas 6:30 hangtud na sa alas 7:00 sa gabii ug replay usab kini alang sa worldwide broadcast sa NBN World nga libre gihapon.

Ang kagamhanan sa probinsiya sa Sugbu mobayad lamang og P2 mil matag 30 minutos nga broadcast sa NBN Cebu Station.

Gawas ni Garcia ug ni Isabelo, nakapirma usab sa maong kontrata si Publio Briones III ang Consultant on TV Programming and Production sa Kapitolyo nga maoy nagsilbing saksi sa maong kasabutan. - Chester Abadilla (BANAT NEWS)