CEBU, Philippines – Samtang dili madawat sa mga Martinez ug sa ubang opisyal sa lungsod sa Bogo si Kongresista Benhur Salimbangon, sukwahi ang gipakita sa ilang kabanay sa lungsod sa San Remegio ngadto sa kongresista.
Sila si San Remegio Mayor Mariano “Mar” Martinez, anak nga si Miguel ug Bise-Mayor Niño Martinez Bascon misangpit kang Salimbangon og “congressman” sa ilang pakigpulong atol sa pagpahigayon sa ikaduhang Lapyahan Festival sa miaging Sabado. Si Salimbangon nang-apod-apod usab og mga multicabs niadtong Miyerkules sa mga barangay Batad, Dapdap, Takop, Lawis, Bangcasan ug Tambongon.
Sa 27 ka barangay sa lungsod sa San Remegio, 23 na ang nakadawat sa maong mga multicabs. Gikataho nga si Bogo Mayor Celestino “Junie” Martinez ug ubang opisyal sa lungsod sa Bogo dili gayud modawat sa tanyag ni Salimbangon nga hinabang pinansiyal alang sa paghuman sa ilang mga proyekto ilabi na nga nabalik sila karon isip lungsod.
Sa sayo pa matud pa ni Salimbangon nga andam siya mogahin og pundo sa iyang Priority Development Assistance Fund alang sa mga proyekto sa Bogo sanglit mobalik man sa gamay ang ilang Internal Revenue Allotment karon nga usa na sila ka lungsod. Si Salimbangon nihatag og tag P10,000 matag usa sa lima ka contingents sa miaging Lapyahan Festival sa San Remegio.
Mitambong si Salimbangon sa kalihukan uban ni Gob. Gwendolyn Garcia. Sila si Mar, anak nga si Miguel isip pangulo sa fiesta executive committee ug Bascon nihatag sa tagsatagsa nila ka welcome message sa wala pa sugdi ang ritual showdown competition. Sila si Junie ug Mar manag-agaw samtang pag-umangkon ni Junie si Bascon. Mitambong usab sila si kanhi Bogo bise-mayor Nilda Martinez, inahan ni Junie, igsuon ni Junie nga si Malou nga inahan ni Bascon, Ada nga asawa ni Mar ug uban pang banay sa mga Martinez gawas nilang Junie, asawa nga si kanhi Kong. Cavel Asas-Martinez ug anak nga si kanhi Bogo Mayor Celestino “Tining” Martinez III nga maoy gipilde ni Salimbangon sa miaging eleksiyon. - Gregg M. Rubio (BANAT NEWS)