Granada pakanaugon ni Baquerfo sa munisipyo

CEBU, Philippines – Nanganti si Mayor Rogelio Baquerfo nga iyang pakanaugon sa munisipyo ang karibal nga si Mayor Demetrio Granada human gipagawas na ang desisyon sa Comelec en banc nga nagbasura sa motion ni Granada nga pugngan ang paglingkod ni Baquerfo sa pagkamayor sa Tudela.

Ang desisyon usab nagmando nga hingpit niining giila si Baquerfo isip mayor sa maong lungsod.

Sumala pa ni Baquerfo nga naabot sa iyang lungsod ang opisyal nga desisyon ug kamanduan sa Comelec sa pormal niyang paglingkod.

 Apan kun magdumili sa pagkanaug si Granada, misaad kining gamiton ang iyang police power isip mayor sa pagpasikop kang Granada.

 Hinuon iyang gitataw nga ipaagi kini niya sa Department of Interior and Local Government (DILG-7) nga posibleng mao nay magmando sa mga polis nga pakanaugon na si Granada.

 Naglaum hinuon si Baquerfo nga boluntaryong mokanaog si Granada sa munisipyo ug motuman na lang sa kamanduan sa Comelec.

 Gipahibalo usab ni Baquerfo nga sa iyang paglingkod hayan maapektohan gyud ang kapin sa 80 ka mga job order workers ni Granada kay sigurado gyud kining matangtang sila sa ilang trabaho.

 Samtang gisugdan na usab ni Baquerfo ang pagkuha sa balay ug yuta ni Granada nga gihimong property bond aron makapagawas og pundo ang munisipyo pagsuweldo sa mga empleyado nga gi-hire ni Granada. Segun sa ilang napirmahang kasabutan, si Baquerfo nagkanayon nga ang balay ug yuta ni Granada iya na sa kagamhanan sa lungsod sa Tudela. - Chester Abadilla (BANAT NEWS)