Kagawad nanion sa gika-ibgan

CEBU, Philippines – Dakong problema ang atubangon sa usa ka kagawad sa barangay Zapatera human mipasangil ang 22-anyos nga babaye nga namitad kini sa iyang buhok ug nanion og armas tungod sa matud pa grabe nga pagpangabubho nga dili siya tagdon niini niadtong Sabado sa kaadlawon sa sitio Riverside, dalan Sikatuna, barangay Lorega-San Miguel ning dakbayan.

Kasong oral defamation ug grave threats ang giandam sa kapolisan nga ipasaka karong adlawa batok ni Kagawad Alex Estanilla, 65.

Si Estanilla gipasanginlan sa usa ka Virginia Baguio, 22, residente sa naasoy’ng dapit, nga nanghulga.

Si SPO2 Rodriho Mangubat sa Parian Police Station nga nahinabi sa Banat News nagkanayon nga niadtong Sabado sa kaadlawon, si Baguio uban sa iyang higala nga si Marjorie (apelyido gipugngan), usa ka minor de edad, samtang naglakaw sa karsada paingong pauli sa ilang pinuy-anan.

Matud ni SPO2 Mangubat nga kalit lang mibutho si Estanilla ug misinggit “Hoy! Ngari gud unsa man ka, nagpa-“_ _ _ _” nasad ka sa mga lalaki diha?”

Human sa pagsulti, gilabnot ni Estanilla ang buhok ni Baguio dungan sa pagbira niini dayong tion og armas sa iyang tuong kilid nga nanghulga nga pabuthon kun dili kini mo-uban niya og inom.

Si Estanilla giingong nanghulga pa gyud kang Baguio pinaagi sa pag-ingon nga patyon kini ug ang kauban niining bayot.

Matud pa ni Baguio nga nagpakiluoy siya kang Estanilla nga dili siya pusilon niini kay duna siyay anak.

Napakgang ang pagpanghulga ni Estanilla sa dihang naabot ang wala mailhing anak-anak niini ug miilog sa dala niining armas ug giguroy pauli sa ilang panimalay.

Niadtong Miyerkules sa buntag, si Estanilla ug Baguio nag-atubang sa Parian Police Station human mireklamo ang naulahi. Sumala pa ni Baguio nga iya na gyud tinud-on og kiha tungod kay gipabuthan na siya niini kaniadto.

Si Sr. Insp. Bonifacio Garciano, hepe sa Parian Police Station nga gikahinabi sa Banat News nagkanayon nga si Estanilla miangkon kaniya nga nangabubho siya niadtong tungora gumikan kay dugay na siya nga naibog ni Baguio.

Si Sr. Insp. Garciano nagkanayon nga si Estanilla nangangkon nga maghatagan siya og salapi ngadto kang Baguio. Apan si Baguio mihimakak niini ug miingon nga ang higala lamang niini ang kanunay nag-ulo-ulo sa kagawad aron mangayo og kuwarta. Gumikan sa kahadlok sa hulga ni Estanilla, iya gyud kining gitinuod og reklamo. – BANAT NEWS