Dalagita giluba sa kabit sa iyang papa

CEBU, Philippines - Samdan ang usa ka dalagita human kini dunggaba sa giingong uyab kuno sa iyang amahan didto sa Bayanihan Village, barangay Basak Pardo dakbayan sa Sugbo sa miaging gabii.

Ang biktima mao si Caryl Merced,15, nga taga Bayanihan Village samtang ang suspek nailhan usab nga si Mary Jane Negro, hingkod, nga taga sitio Mayupay, barangay Quiot.

Si Honeylyn Jimeno ,ig-agaw sa biktima, mibutyag sa Banat News nga ang suspetsado kalit lang nga mitunga sa gawas sa panimalay sa biktima ug gikatahong nagyaw-yaw kini.

Hinungdan nga ang inahan sa biktima daling migawas sa ilang balay ug didto nagsugod ang tinubagay sa duha.

Ang biktima kinsa misuway pag-uwang aron dili magkabugno ang duha, maoy giluba sa suspetsado.

Hinuon walang bukton ray gitaroyan sa kutsilyo ug dali kaayo kining gihatod ngadto sa Cebu City Medical Center, samtang ang suspek dali kaayong nakasibat human siya makadunggab.

Wala usab kakuhai og pamahayag sa kapolisan si William Jimeno, ang amahan sa biktima kinsa giingong uyab sa suspek. - Lesley Caminade (BANAT NEWS)