700 ka puno-ang marijuana gilarot

CEBU, Philippines - Mikapin sa 700 ka mga puno-an sa marijuana ang gilarot sa kapulisan didto sa bukirang bahin sa Sitio Bunga, barangay Tugunan ,siyudad sa Danao kagahapon sa buntag.

Si SPO4 Teofilo Deguilmo, desk officer sa Danao City Police Station mibutyag sa   Banat News nga ang grupo nga gipangulohan ni Sr/Insp. Ceriaco Larrobis naghatod og warrant of arrest sa suspek nga si Ronald Batican, kinsa gipasakaan og kasong murder.

Apan matud pa ni SPO4 Deguilmo nga may mitaho kanila nga nagtago- tago sa sitio Bunga ang suspek hinungdan nga gi-adto nila ni Larrobis ang maong lugar.

Apan samtang nagpunay sila’g paniid sa palibot, maoy ilang nakita ang usa ka plantasyon sa marijuana sa suok nga bahin sa maong dapit.

Maoy hinungdan   nga wala sila mag-usik og panahon, gilarot nila ang tanang mga punoan sa gidugayong upat ka oras una sila nahuman og linarotay.

Hinoon walay nadakpan ang kapolisan tungod kay walay tawo diha sa palibot sa ilang pagpangibot sa maong mga tanom.

Ang mga linarot nga marijuana kasamtangang gipahiluna karon sa buhatan sa kapulisan samtang nagpaabot sa kamanduan gikan sa Cebu Police Provincial Office (CPPO) alang sa pagdaob niini. – BANAT NEWS