Rep. Jun Alcover sa ANAD manumpa ni gwen

CEBU, Philippines – Manumpa ang bag-ong Kongresista nga si Anad Partylist Jun Alcover ngadto ni Gobernador Gwendolyn Garcia karung Biyernes sa gabii diha sa Capitol Social Hall.

Si Alcover ug Garcia pareho og kawsa batok sa insurhensiya sa nasud ug ilabi na dinhi sa Sugbu, ang gobernador mideklarar og “all-out war” batok sa mga rebeldeng komunista.

Samtang atol sa maong adlaw ania usab dinhi sa Sugbu si Jovito Palparan sa Bantay Partylist aron mosaksi sa pagpanumpa ni Alcover ngadto ni Garcia

 Si Palparan ug si Alcover parehong bag-ong milingkod sa Kongreso niadtong milabay’ng bulan human sa desisyon sa Korte Suprema nga dugangan og laing 29 ka partylist representative ang Kongreso.

Si Palparan nahimong opisyal kaniadto sa Armed Forces of the Philippines (AFP) ug hepe kaniadto sa intelligence unit, nahimong kontrobersyal si Palparan human pasanginli sa mga walhong pundok nga maoy utok sa mga extrajudicial killings ug pagpangsignit sa mga militante.

Ang maong kalihokan tambongan sa kadagkuan sa Central Command (Centcom) ubos sa pangulo ni Major General Armando Cunanan ug ingon man sa Armed Forces of the Philippines (AFP) ug Philippine Army (PA).

Lakip sa mosaksi karung Biyernes sa gabii mao ang unom ka kongresista dinhi sa Sugbu ug ang tanang mayor sa kalungsoran sa probinsya. - Rey Pasaporte (BANAT NEWS)